Որոշել եք խոհանոցը վերանորոգել, բայց չգիտե՞ք, թե որտեղից սկսել, ինչ շինանյութ գնել։ Ահա փոքրիկ ուղեցույց, որը կօգնի հեշտ ու արագ պատկերացում կազմել, թե խոհանոցն ինչպես պետք է վերանորոգել։
Մինչ վերանորոգումը սկսելը կատարում ենք նախապատրաստական աշխատանքներ՝ նախապես հեռացնելով հին սալիկները, հատակի ծածկույթը, դռները (եթե փոխելու անհրաժեշտություն կա) պատերի պաստառները և այլն։ Նախնական աշխատանքները կատարելուց հետո անցնում ենք անհրաժեշտ շինանյութի նախահաշվարկին։
Հիշեք՝ կարևոր է շինանյութի ճիշտ հաշվարկ կատարելը, ինչը կօգնի խնայել գումարն ու զերծ մնալ ավելորդ ծախսերից։
Պատուհանների տեղադրում
Եթե արդեն մասնագետի օգնությամբ որոշել եք պատուհանների չափերը, ապա կարելի է դրանք պատվիրել և ժամանակ չկորցնել։
Պատուհանները տեղադրելուց հետո մի շտապեք հեռացնել պաշտպանիչ թաղանթները, քանի որ վերանորոգման ընթացքում հնարավոր է այն պատվի ծեփամածիկով կամ ներկով։
Հարց է առաջանում․ իսկ ինչո՞ւ պատուհանները տեղադրել սկզբում և ոչ թե այն ժամանակ, երբ ամեն ինչ մաքուր կլինի։ Պատճառն այն է, որ հին շրջանակները հանելուց հետո խորշերը հարթեցնելու կարիք է լինում, իսկ դա վերանորոգումից հետո անելը ճիշտ չէ։
Էլեկտրականության և ջրամատակարարման խնդիրների լուծում
Անհրաժեշտ է փոխել հին հոսանքալարերը, խողովակներն ու կարգավորել ջրամատակարարումը, այնուհետև տեղադրել վարդակներն ու անջատիչները։
Որոշում ենք մարտկոցների տեղը
Մարտկոցները հարկավոր է տեղադրել ամենավերջում, երբ արդեն վերանորոգման աշխատանքներն ավարտված կլինեն։ Սակայն մինչ այդ պետք է հոգ տանել խողովակները տեղադրելու մասին և նախապես որոշել մարտկոցների ամենահարմար վայրերը։
Առաստաղի ու պատերի հարդարում
Եթե առաստաղն անհարթություններ ունի, ապա նախքան այն հարդարելը հարկավոր է հղկել ու հարթեցնել։
Հիշեք՝ առաջին շերտն այնքան էլ արագ չի չորանում․ երբեմն դա տևում է 4-5 օր (կախված շերտերի քանակից)։ Այն հատվածներում, որտեղ հարկավոր է մեծ քանակությամբ ծեփամածիկ, պետք է օգտագործել հատուկ ցանց, որը կօգնի խուսափել անհարթություններից։
Առաստաղը կարելի է հարդարել ներկով, պաստառներով կամ գիպսոկարտոնե սալերի օգնությամբ։ Եթե ընտրել եք վերջին տարբերակը, ապա դա պետք է անել նախքան պատերի հարդարումը։
Հատակի ծածկույթների տեղադրում
Այժմ հերթը հատակի ծածկույթներինն է։ Նախապես հարկավոր է ընտրել, ապա մասնագետների օգնությամբ կամ ինքնուրույն տեղադրել։ Խոհանոցի հատակի ծածկույթների մասին մանրամասն խոսել ենք «Ընտրում ենք հատակի ծածկույթ խոհանոցի համար» հոդվածում։
Հաջորդ և վերջին քայլը սենյակում լուսավորություն ապահովելն ու նախապես պատվիրված կահույքը տեղադրելն է։
Դե ինչ, կարելի է արդեն վայելել խոհանոցն իր ողջ հարմարավետությամբ։