Նորաձևության թրենդներն ամեն տարի փոփոխվում են՝ առաջ բերելով նոր կամ հնի կատարելագործված տարրեր։
Ներկայացնում ենք 2020 թվականին ինտերիերում նորաձև համարվող գույները։
Ո՞ր գույների վրա պետք է շեշտը դնել
Մուգ կապույտ
Ըստ մասնագետների՝ մուգ կապույտը հիանալի ֆոն է, սակայն եթե խուսափում եք ամբողջ սենյակը մուգ գույնով հարդարելուց, ապա սա կարելի է օգտագործել բազմոցի պաստառների, ծածկոցների, բարձերի կամ ննջասենյակի պատերի հարդարման համար։
Անանուխային երանգ
Անանուխային երանգը դասվում է սառը գույների շարքին և ինքնաբերաբար սառնության զգացողություն առաջացնում։ Սակայն այս գույնին ջերմություն հաղորդելու համար այն կարելի է օգտագործել՝ համադրելով փայտի բաց երանգների հետ։ Այն ինտերիեր կարելի է ներմուծել կահույքի, աքսեսուարների, արվեստի ստեղծագործությունների միջոցով, ինչպես նաև կիրառել սենյակներից որևէ մեկի պատերի հարդարման համար։
Բաց երկնագույն
Սա թարմություն ու պարզություն խորհրդանշող գույներից է, որը պետք է զգուշորեն ու մասնակի օգտագործել ինտերիերում։ Օրինակ՝ հարդարել լոգասենյակը բաց կապույտ գույնով կամ սենյակի վարագույրներն ընտրել այս երանգներով և այլն։
Մանուշակագույն
Շատերը խուսափում են այս գույնը կիրառելուց՝ այն համարելով մռայլ ու ձանձրալի, մինչդեռ կան մարդիկ, որոնց համար մանուշակագույնը գեղեցիկ ու ոճային ինտերիեր ստեղծելու միջոց է։
Մասնագետները խորհուրդ են տալիս մանուշակագույնն օգտագործել մոխրագույնի համադրությամբ։ Իսկ որոշակի շեշտադրումներ անելու համար ընդգծել պատերից մեկը կամ այն ներմուծել ինտերիեր վարագույրների, փափուկ կահույքի, ծածկոցների և այլ դեկորների միջոցով։
Տաք վարդագույն
Այս գույնը կարելի է օգտագործել ընդարձակ տարածքների հարդարման համար։ Օրինակ՝ հյուրասենյակի դռները, բազմոցն ընտրել այս գույնով, հարդարել ննջասենյակի կամ խոհանոցի պատերը կամ օգտագործել աղջիկ երեխայի ննջասենյակը հարդարելիս։
2020 թվականին նորաձև գույներն այսքանով չեն սահմանափակվում։ Մյուս գույներին կանդրադառնանք մեր հաջորդ հոդվածներից մեկում։