Ննջասենյակն այն վայրն է, ուր պետք է լինի կատարյալ ներդաշնակություն՝ սկսած պատերի հարդարումից մինչև կահույքի ճիշտ համադրություն։ Ուստի ցանկացած քայլ պետք է լինի հաշվարկված։
Առաջարկում ենք ծանոթանալ ննջասենյակի պատերի դիզայնի մի քանի հետաքրքիր լուծումների, որոնք ինտերիերը կդարձնեն յուրօրինակ ու ոճային։
Վերջին ժամանակներում շատ տարածված է ակցենտային պատի կիրառումը, որի շնորհիվ հնարավոր է դառնում առանձնացնել սենյակի տարբեր գոտիները։ Ննջասենյակի դեպքում ակցենտային պատը հաճախակի կիրառվում է հենց մահճակալի հատվածում։ Այդպես առանձնանում է հանգստի գոտին ու ստեղծվում առանձին անկյուն։
Ակցենտային պատ ստեղծելու գործում կարևոր են կիրառվող նյութերը, որոնցից մի քանիսին կանդրադառնանք մեր այսօրվա հոդվածում։
Ծեփամածիկ
Սա հիանալի տարբերակ է ննջասենյակի հարդարման համար։ Բացի այդ, կարելի է կիրառել դասականից մինչև մինիմալիստական ոճի ինտերիերում։ Ծեփամածիկի շնորհիվ հնարավոր է թաքցնել պատերի որոշակի թերությունները։
Սալիկներ
Սալիկների միջոցով նույնպես կարելի է ստանալ գեղեցիկ ակցենտային պատ։ Այն կարող է լինել ինչպես միագույն, այնպես էլ տարատեսակ նախշերով։ Սալիկների առավելություններից մեկն այն է, որ հեշտ է մաքրվում, իսկ թերությունը սառնության տպավորությունն է։ Սակայն ճիշտ ընտրված գույների ու նախշերի շնորհիվ կարելի է ստանալ «տաք» ինտերիեր։
Կաշի
Կաշվե փափուկ պատը շքեղության տպավորություն է ստեղծում ինտերիերում։ Այն կարելի է համադրել միագույն պաստառների կամ դեկորատիվ ծեփամածիկի հետ։
Գործվածք
Կտորի կիրառումը պատերի հարդարման գործում գալիս է դեռևս վաղ ժամանակներից։ Այս շարքին կարելի է դասել նաև գորգը, որը մինչ օրս էլ հանդիպում ենք։
Կտորային պատի շնորհիվ կարելի է թաքցնել թերությունները, ստեղծել ոճային ու նրբաճաշակ ինտերիեր։
Փայտ
Փայտը ստեղծում է հետաքրքիր դիզայն, հարմարավետ ու գեղեցիկ ինտերիեր։ Այն օգնում է թաքցնել ինչպես մեկ պատի, այնպես էլ ողջ սենյակի թերությունները։ Եվ բացի այդ, հաղորդում է ջերմություն, հանգստություն ու դրական էներգիա։
Լամինատ
Լամինատը հիանալի տարբերակ է պատերի հարդարման համար։ Այն ոչ միայն գեղեցիկ է, այլև ծառայում է երկար, իսկ տեղադրումը չափազանց հեշտ է։ Բացի այդ, ունի գունային ու նախշային լայն ընտրանի։ Լամինատե պատերի ամենահետաքրքիր լուծումներին կարող եք ծանոթանալ «Պատերի հարդարում լամինատով» հոդվածում։
Գիպսակարտոն
Գիպսակարտոնի շնորհիվ հնարավոր է ստանալ տարատեսակ դիզայներական լուծումներ։ Այն կարելի է ներկել, հարդարել փայտե պանելներով, տեղադրել լուսավորություն և այլն։
Դեկորատիվ քար
Սա լայնորեն կիրառվում է տարբեր սենյակների երեսպատման համար։ Ստեղծում է յուրահատուկ ու երկարադիմացկուն կոմպոզիցիաներ։ Առանձնանում է իր ամրությամբ, մաշվածակայուն մակերեսով, լավ ջերմահաղորդականությամբ։ Դեկորատիվ քարն առանձնակի խնամք չի պահանջում․ փոշին ու կեղտը կարելի է մաքրել սովորական խոնավ կտորով։
Դե ինչ, կարող եք շտապել իրականացնելու այս հետաքրքիր դիզայն-գաղափարներն ու ստեղծելու ձեր հանգստի անկյունը։