Ինչպես ցանկացած հարդարման աշխատանք, այնպես էլ պատերը ներկելը մեծ ուշադրություն ու կենտրոնացում պահանջող գործընթաց է։ Գերազանց արդյունք ստանալու համար կարևոր է հետևել ներկման կանոններին, որոնք, կպարզենք մեր այսօրվա հոդվածում։
Անհրաժեշտ գործիքներ
Նախքան ներկելը, պետք է զբաղվել համապատասխան ներկի ընտրությամբ, որից հետո նախապատրաստել ներկարարական պարագաները։ Դրանք են՝ տարբեր չափերի ներկագլանակներ, պատերը հղկող գործիքներ, վրձին, որը հարկավոր է լինում ավելի բարդ հատվածների ներկման համար, ներկարարական ժապավեն, որն օգտագործվում է անցանկալի հատվածները չներկելու համար և այլն։
Գործիքներն ընտրելուց հետո հարկավոր է ներկվող սենյակը պատել պոլիէթիլենային թաղանթով՝ մաքրությունը պահպանելու համար։
Խորհուրդներ ներկարարական աշխատանքների համար
Առաջին հերթին պետք է պարզել, թե պատերն ինչ վիճակում են, քանի որ դրանով է պայմանավորված վերջնական արդյունքը։
Պատերը պետք է լինեն հարթ, այլապես ներկելուց հետո թերություններն ավելի նկատելի կլինեն։ Եթե մինչ այդ պատված են եղել պաստառներով, անհրաժեշտ է դրանք հեռացնել մածկաթիակի օգնությամբ։ Այնուհետև հղկաթղթի միջոցով վերացնել ավելորդ անհարթությունները։
Հաջորդ քայլը ներկագլանակի նախապատրաստումն է։
- 2-3 ժամ պահում ենք օճառի լուծույթի մեջ
- Լվանում ենք հոսող ջրի տակ
- Չորացնում ենք
Եթե հետևեք այս քայլերին, ապա պատերը զերծ կլինեն մազմզուկներ հավաքելու հավանականությունից։
Ինչպես ներկել պատերը
Գոյություն ունի ներկելու երկու մեթոդ՝ վարից վեր շարժումներով և հորիզոնական ուղղությամբ։
Վարից վեր մեթոդը կօգնի խուսափել ներկի շերտավորումից, իսկ հորիզոնական ներկումը կընդգրկի տարածքի ողջ ծածկույթը։
Երբեմն նույնիսկ այս երկու տեխնիկաներն օգտագործվում են միաժամանակ՝ կատարյալ արդյունքի հասնելու համար։
- Ներկագլանակը պատում ենք ներկով
- Ներկումը սկսում ենք պատուհաններից
- Ներկագլանակն ամուր չենք սեղմում՝ հետքերից ու շերտավորումից խուսափելու համար
- Գործողությունները կատարում ենք սահուն կերպով
- Չենք մոռանում, որ ներկի երկրորդ շերտը պետք է քսել առաջինի շերտի լավ չորանալուց հետո
Հետևեք այս կարևոր խորհուրդներին և կկարողանաք պատերը ներկել ինքնուրույն։