Խոհանոցի պատերը կարելի է հարդարել ամենատարբեր նյութերով։ Միգուցե փոքր-ինչ զարմանալի թվա, բայց խոհանոցը կարելի է հարդարել նաև պաստառներով։ Սակայն ինչպե՞ս ընտրել և ո՞ր տեսակներին նախապատվությունը տալ փոքր խոհանոցի դեպքում, հենց այս մասին էլ կխոսենք մեր այսօրվա հոդվածում։
Պաստառների գույներն ու նախշերը կարող են մեծ դեր ունենալ տարածքի ընդարձակման ու ընդհակառակը կրճատման հարցում։
Ահա մի քանի խորհուրդ, որոնք կօգնեն կողմնորոշվել պաստառների բազմազանության մեջ և ճիշտ որոշում կայացնել։
Լավ լուսավորություն
Որքան սենյակը փոքր է, այնքան պետք է լուսավոր լինի։ Սա նշանակում է, որ մուգ գույների մասին հիշելն անգամ ավելորդ կլինի, որքան էլ դրանք ձեզ դուր են գալիս։
Սակայն բաց երանգի վրա մուգ նախշերով պաստառները հիանալի լուծում կլինեն խոհանոցի համար։ Մյուս կողմից էլ պետք է խուսափել բացարձակ ճերմակ գույնը խոհանոցում կիրառելուց։ Նախևառաջ դա այնքան էլ լավագույն տարբերակը չէ խոհանոցի համար, իսկ մյուս կողմից էլ կեղտոտվելու հավանականությունը շատ մեծ է։
Նախշերի ու գույների ճիշտ ընտրություն
Որքան խոհանոցը փոքր է, այնքան մանր պետք է լինեն նախշերը։ Չեք սխալվի, եթե ընտրեք բաց գույնի պաստառներ մանր նախշերով։ Խուսափեք նաև ուղղահայաց գծերով պաստառներից, որոնք խոհանոցի տարածքը տեսողական առումով ավելի են կրճատում։ Գծային նախշերը կարելի է կիրառել միայն մեկ պատի դեպքում՝ այն ընդգծելու համար։
Խուսափեք նաև անհամապատասխան գույները համադրելուց։ Օրինակ, եթե կահույքը լաքապատ է, ապա պետք է ընտրել հարթ ու ոչ այնքան վառ պաստառներ։
Այս չափանիշներն ու ժամանակակից շուկայում առկա պաստառների լայն տեսականին հնարավորություն կտան ընտրելու Ձեր նախընտրած գույներն ու նախշերը տան ամենակարևոր սենյակներից մեկի՝ խոհանոցի համար։