Վերանորոգելիս շատ հաճախ բախվում ենք մի կարևոր հարցի՝ ի՞նչ ծածկույթ ընտրել հատակի և հատկապես խոհանոցի հատակի համար։ Այսօր հատակի ծածկույթների տեսականին այնքան բազմազան, է, որը մի կողմից ընտրությունը հեշտացնում է, իսկ մյուս կողմից` մոլորեցնում։
Այդ իսկ պատճառով առաջարկում ենք ծանոթանալ հատակի տեսակներին ու դրանց առանձնահատկություններին, ինչը կօգնի ճիշտ ու գրագետ որոշում կայացնել։
Նախքան ընտրություն կատարելը պետք է հաշվի առնել, թե որտեղ է գտնվում խոհանոցը։
- Բազմաբնակարան շենքի միջին հարկերը կարելի է հարդարել ցանկացած ծածկույթով, քանի որ հատակը սովորաբար տաք է լինում և լրացուցիչ տաքացման անհրաժեշտություն չի լինում։
- Առանձնատան կամ շենքի առաջին հարկում գտնվող խոհանոցի համար ընտրությունը փոքր-ինչ բարդ է, քանի որ տարվա ցուրտ եղանակներին հատակը բավականին սառն է լինում։
Հատակի տեսակներն ու դրանց կիրառությունը խոհանոցում
Գոյություն ունեն հատակի ծածկույթների բազմաթիվ տեսակներ, որոնցից ամենատարածվածներն են՝
Սալիկներ
Խոհանոցի հատակի համար բոլոր ժամանակների լավագույն տարբերակներից մեկը կերամիկական սալիկն է։ Այն առանձնանում է իր երկարակյացությամբ, մատչելի գնով և խնամքի պարզությամբ։
Միակ թերություններից մեկը հատակի սառը լինելն է, որը, սակայն, կարելի է կարգավորել՝ հատակի ջեռուցումն ապահովելով։
Կերամիկական սալիկների տեղադրումը մեծ ուշադրություն է պահանջում, քանի որ սխալ կամ թերի լինելու դեպքում դրանք կարող են տեղում լողալ, շարժվել։
Լամինատ
Լամինատե հատակի տեղադրումն ու խնամքը չափազանց հեշտ է․ այն նաև մաշվածակայուն ու երկարադիմացկուն է և բացի այդ, ունի գունային ու նախշային ընտրության բազմազանություն։ Ընտրելիս պետք է հիշել նաև կարգի մասին՝ շեշտը դնելով հարվածակայուն ու ջրակայուն տարբերակի վրա։
Մի մոռացեք, որ խոհանոցը մնում է խոհանոց, ձեռքից կարող է ընկնել թավան, դանակը և այլ խոհանոցային իրեր, որոնք կարող են վնասել հատակը։ Խոհանոցում անհնար է խուսափել նաև ջրի կաթիլներից, իսկ լամինատը ջուր այնքան էլ «չի սիրում»։
Եթե սենյակը գտնվում է առաջին հարկում և խոնավ է, ապա խուսափեք լամինատե հատակից։
Լինոլեում
Լինոլեումի տեղադրումը չափազանց հեշտ է, սակայն դա պետք է լինի շատ հարթ մակերեսի վրա, որպեսզի կարկատանններ չլինեն։
Ամուր լինոլեումը «չի վախենում» խոնավությունից, քերծվածքներից։ Այն ունի նաև մեկ կարևոր առավելություն՝ հեշտ մաքրությունը։ Կոշիկի հետքերը վերացնելու համար ընդամենը հարկավոր է բամբակը թրջել ացետոնով և մաքրել կեղտոտ հատվածները։
Փայտե հատակ
Փայտե հատակը խոհանոցի համար ամենանախընտրելի տարբերակներից մեկն է։ Այն տաքացնելու անհրաժեշտություն չկա, քանի որ ինքնին տաք է։ Բացի այդ, փայտե հատակը ոչ միայն գեղեցիկ է, այլև էկոլոգիապես մաքուր։
Այժմ ընտրությունն ավելի հեշտ կլինի, երբ պարզեցինք, թե որոնք են խոհանոցի հատակի համար ամենահամապատասխան ծածկույթները։