Շրիշակը (ռուս․ плинтус) բնակարանի հարդարման կարևորագույն տարրերից է, որն ամրացվում է պատի ստորին հատվածում և սահմանագծային դեր է կատարում պատերի ու հատակի միջև։
Շրիշակների դերն ինտերիերում չափազանց մեծ է․ առանց դրանց վերանորոգումն ամբողջական ու ավարտուն չի լինի։
Իսկ թե շրիշակների ինչ տեսակներ կան և ինչ պետք է հաշվի առնել ընտրելիս, կպարզենք այս հոդվածում։

Շրիշակները տարբերակող հիմնական հատկանիշը պատրաստման նյութն է։ Դրանք լինում են՝

  • Փայտից
  • ՄԴՖ-ից
  • Պլաստմասսայից
  • Մետաղից

Կան նաև այլ նյութերից պատրաստվող շրիշակներ, օրինակ՝ քար, կերամիկա և այլն։

շրիշակների գույները

Ինչպե՞ս ընտրել շրիշակներ

Ինչպես գիտենք, շրիշակներն ինքնուրույն տարրեր չեն համարվում ինտերիերում, ուստի ընտրելիս պետք է առաջնորդվել մի շարք հատկանիշներով՝ հաշվի առնելով դռների, պատուհանների, կահույքի, ինչպես նաև հատակի գույները։ Բացի գունային համադրությունից, ուշադրություն պետք է դարձնել նաև շրիշակի պատրաստման նյութին։
Փայտե շրիշակները հիանալիորեն համադրվում են ցանկացած պատերի ու հատակի հետ։ Պլաստմասսան հարմար է լինոլեումի, լամինատե հատակների և կովրոլինի դեպքում, իսկ քարե կամ կերամիկական շրիշակները համադրվում են մարմարի, գրանիտի և սալիկների հետ։

շրիշակների տեսակները

Շրիշակների համադրությունները

Շրիշակներն ունեն նաև գունային համադրություններ, որոնց շնորհիվ ինտերիերը դառնում է ներդաշնակ ու համահունչ բոլոր տարրերին։

Համադրություն պատերի գույնի հետ: Այս համադրությունը թույլ է տալիս թաքցնել կամ ընդգծել պատերի ու հատակի միջև եղած սահմանները։ Եվ որպեսզի համադրությունը լինի ճիշտ, պետք է ընտրել ոչ թե պատերին համապատասխան, այլ չեզոք կամ ավելի վառ գույնի շրիշակներ։

Համադրություն հատակի գույներին: Դիզայներական կանոնների համաձայն՝ շրիշակներն ընտրում են հատակի գույնին համապատասխան, այսինքն՝ ավելի բաց կամ ավելի մուգ երանգներով։

Դռների ու պատուհանների գույնին համապատասխան շրիշակներ: Դիզայներները խորհուրդ են տալիս ընտրել դռներին կամ պատուհաններին համապատասխան միայն այն դեպքում, եթե դրանք փայտից են։

Չմոռանանք, որ շրիշակները նաև հիանալիորեն թաքցնում են հաղորդալարերը, ինչն արդեն իսկ կոկիկ ու գեղեցիկ ինտերիեր ունենալու գրավական է։