Խոհանոցի լվացարան գնելիս առաջին հերթին ուշադրություն ենք դարձնում դիզայնին, ապա՝ որակին, պատրաստման նյութին ու առանձնահատկություններին։
Այսօր կխոսենք պողպատե լվացարանների ու դրանց տեսակների մասին և թե ինչ պետք է հաշվի առնել գնելիս։
Պողպատե լվացարանների առավելություններն ու թերությունները
Ամենակարևոր առանձնահատկություններից մեկն այն է, որ պողպատե լվացարանները հեշտությամբ են ներմուծվում ցանկացած ոճի, գույնի ինտերիեր։
Հասանելի գին
Նույնիսկ դիզայներական ամենահետաքրքիր լուծումներով տարբերակները կարելի է գնել բավականին խելամիտ գնով։
Հարվածակայունություն
Պողպատե լվացարանը զերծ է քայքայումից ու մեխանիկական ազդեցություններից։ Եվ բացի այդ, սպասքը հանկարծակի ընկնելու դեպքում չի կոտրվում ու չի քերծվում։
Հեշտ խնամք
Մաքրություն անելիս կարելի է օգտագործել ցանկացած մաքրող միջոց։ Դրանք որևէ հետք չեն թողնում մակերեսին, սակայն արդյունավետորեն ոչնչացնում են մանրէները։
Ջերմակայունություն
Պողպատե լվացարաններն առանձնանում են նաև բարձր ջերմակայունությամբ։ Անգամ տաք կաթսան ու թավան վրան դնելու դեպքում պետք չէ վախենալ, որ լվացարանի մակերեսը կփչանա, և այն կկորցնի իր գեղեցիկ տեսքը։
Պողպատե լվացարանի միակ թերությունը ջրի ձայնից առաջացած աղմուկն է։
Ինչ պետք է հաշվի առնել պողպատե լվացարան ընտրելիս
Առաջարկում ենք ծանոթանալ այն կարևոր հատկանիշներին, որոնց պետք է ուշադրություն դարձնել ճիշտ ընտրություն կատարելու համար։
Ստուգեք մետաղի որակը
Մագնիսի օգնությամբ պարզեք մետաղի որակը։ Եթե այն լողում է մակերեսին, ուրեմն որակյալ արտադրանք է։ Սակայն սա բավական չէ․ անպայման խորհրդակցեք վաճառողների հետ, որոնք կուղղորդեն ճիշտ ընտրություն կատարելու հարցում։
Որոշեք լվացարանի ընդհանուր տեսքը
Հարկավոր է նախապես որոշել լվացարանի տեսակն ու ձևը՝ սովորակա՞ն, թե՞ անկյունային, մեկտեղանի՞, թե՞ երկտեղանի և այլն։
Մեկտեղանի լվացարանները շատ հարմար են միայն սպասք լվանալու համար, մինչդեռ երկտեղանի և երեքտեղանի լվացարաններն առանձնանում են բազմաֆունկցիոնալությամբ։ Իսկ ինչ վերաբերում է անկյունաձև կամ սովորական լվացարանների ընտրությանը, ապա ընտրելիս պետք է հաշվի առնել տարածքի ընդարձակությունը։ Օրինակ, եթե խոհանոցն այնքան էլ մեծ չէ, տեղին կլինի մտածել հենց անկյունաձև լվացարան տեղադրելու մասին, քանի որ այն օգնում է բավականաչափ տարածք խնայել:
Մի մոռացեք հարմարավետության մասին
Ըստ մասնագետների՝ լվացարանի նվազագույն խորությունը պետք է 18 սմ-ից պակաս չլինի, որպեսզի հարմարավետ լինի օգտագործման համար։ Քիչ խորություն ունեցող լվացարանների դեպքում սպասք լվանալիս ջուրը ցայտում է այս ու այն կողմ ու կեղտոտում շուրջբոլորը։
Ահա այն ամենը, ինչ պետք է իմանալ պողպատե լվացարանների մասին։ Իսկ ընտրությունը թողնում ենք Ձեզ։