Լամինատը հատակի ամենատարածված ծածկույթներից մեկն է, որով հարդարված սենյակները մշտապես ունենում են կոկիկ ու նրբաճաշակ տեսք։
Լամինատի առանձնահատկությունների մասին մենք արդեն խոսել ենք «Լամինատի կառուցվածքն ու առանձնահատկությունները» հոդվածում։
vak.am-ը ներկայացնում է քայլ առ քայլ ուղեցույց, որը կօգնի ինքնուրույն տեղադրել լամինատը, եթե անգամ որևէ հմտություն չունեք վերանորոգման ու հարդարման աշխատանքներում։
Ինչպես հատակը հարթեցնել
Առաջին հերթին պետք է հատակը նախապատրաստել։
- Հին բետոնային ծածկույթի ոչ մեծ ճեղքվածքները կարելի է ծածկել ինքնահարթվող խառնուրդով, իսկ մեծ ճաքերի դեպքում նորից սվաղել հատակը։ Այնուհետև սպասել, մինչև լիարժեք չորանա, որից հետո պետք է հղկել։ Հիշեք՝ հատակը լիովին չչորանալու դեպքում խոնավությունից կարող է ուռչել։
- Փայտե հիմնակմախքի դեպքում պետք է համոզված լինել, որ հատակը հարթ է, չի ճկվում։ Հարթեցնել կարելի է նրբատախտակի օգնությամբ, սակայն պետք է հաշվի առնել լամինատի ու պաշտպանիչ շերտի հաստությունները, այլապես դռները կարող են դժվարությամբ բացվել կամ ընդհանրապես չբացվել։ Այդ իսկ պատճառով նախընտրելի է դռները տեղադրել լամինատե հատակը տեղադրելուց հետո։
Երբեմն հարց է առաջանում․ կարելի՞ է լամինատը տեղադրել լինոլեումի կամ սալիկների վրա։ Թույլատրվում է, եթե հիմքը հուսալի է ու հարթ։
Հարկավոր է անպայման տեղադրել համապատասխան տակդիր, իսկ սալիկները պետք է լինեն ոչ միայն հարթ, այլև չունենան կոտրված կամ վնասված հատվածներ։
Տակդիր և մեկուսիչ շերտ
Լամինատը տեղադրելուց առաջ հարկավոր է արդեն նախապատրաստած հատակը պատել մեկուսիչ շերտով ու տակդիրով։ Որպես մեկուսիչ նյութ կարող է ծառայել դիֆուզիոն թաղանթը (диффузионная мембрана) կամ սովորական պոլիէթիլենը, որի հաստությունը պետք է լինի նվազագույնը 6 մմ, այլապես այն հեշտությամբ կվնասվի։
Այն փռում ենք հատակի վրա, ապա կպչուն ժապավենով եզրերն ամրացնում ենք։ Խորհուրդ է տրվում, որ այն հատակից փոքր-ինչ երկար լինի և ձգվի դեպի պատը։
Բացի մեկուսիչից, շատ կարևոր է նաև տակդիրի տեղադրումը, որն ապահովում է՝
- Հատակի ձայնամեկուսացումը
- Մակերևույթի հարթեցումը
- Ջրամեկուսացումը
Տեղադրում ենք լամինատն ինքնուրույն
Մեզ անհրաժեշտ են հետևյալ գործիքները՝
- Չափերիզ և անկյունակ, որպեսզի յուրաքանչյուր սալիկը ճիշտ տեղադրվի
- Էլեկտրական նրբասղոց (лобзик) կամ շինարարական սուր դանակ, որոնք կօգնեն հավասար կտրել լամինատը
- Մուրճ, որն անհրաժեշտ կլինի տախտակներն ամրացնելու համար
Լամինատե հատակի տեղադրման եղանակները
- Lock փականների դեպքում պետք է շատ զգույշ լինել, որպեսզի չվնասվեն։ Իսկ ամրացնելուց հետո անպայման մուրճով հարվածել։
- Click փականներով լամինատները միացվում են` ելուստը փորվածքի մեջ դնելով։
Տեղադրման քայլերը
- Աշխատանքը կատարում ենք շարքերով։ Սկզբում պատի և պանելի միջև դնում ենք սեպերը, որպեսզի հավասար տարածություն ապահովենք պատի ու ծածկույթի միջև:
- Առաջին պանելին ամրացնում ենք հաջորդ լամինատը և այդպես շարունակում մինչև շարքն ավարտվի:
- Տեղադրելիս շատ կարևոր է սկսել անկյուններից, որտեղ տեղադրված են ջեռուցման համակարգի խողովակները։
- Գայլիկոնի (дрель) օգնությամբ կտրվածք ենք անում խողովակների չափով, ապա լամինատի երկու հատվածները սովորական ձևով միացնում ենք իրար, իսկ անցքերի վրա դնում ենք պլաստիկե օղագոտիներ։
Ահա այսքանը լամինատե հատակի տեղադրման մասին։ Որպեսզի ոչ մի քայլ բաց չթողնեք, դիտեք նաև տեսանյութը։