Բնակարանի դիզայնը նախագծելիս պետք է հաշվի առնել ոչ միայն պատերի, առաստաղի ու հատակի ընդհանուր հարդարումը, այլև կարևոր տեղ հատկացնել աքսեսուարներին, դեկորներին և այլն։ Հենց այդ մանրուք թվացող դեկորների ու իրերի շնորհիվ է ինտերիերը դառնում ներդաշնակ։
Այս հոդվածում կանդրադառնանք հայելային դեկորների տեսակներին ու առանձնահատկություններին։
Հայելին ցանկացած տան ու հատկապես լոգասենյակի անբաժանելի մասն է կազմում։ Պակաս կարևոր չեն նաև հայելային դեկորները, որոնք ոչ միայն գեղեցիկ են, ոճային ու նրբաճաշակ, այլև տեսողական առումով ընդարձակում են տարածքը, ստեղծում 3D տպավորություն։
Հայելային դեկորների առավելություններն ու թերությունները
Շատ դեպքերում հայելային դեկորները հիանալի լուծում են լինում, սակայն սխալ կիրառման դեպքում դառնում են անիմաստ ու նույնիսկ խանգարող դեր կատարում։ Ուստի պետք է հաշվի առնել ոչ միայն գեղեցիկ տեսքը, այլև դրանց ճիշտ կիրառությունն ինտերիերում։
Հայելային դեկորներն ինտերիերում կիրառելիս պետք է հաշվի առնել արտացոլանքը։ Այս դեպքում շատ կարևոր է պատի ճիշտ ընտրությունը, որպեսզի արևի ուղիղ ճառագայթները չարտացոլվեն հայելու մեջ։ Նմանատիպ դեկորները պետք է խուսափել կիրառել նաև շատ լուսավոր սենյակներում։ Անհրաժեշտ է առանձնակի ուշադրություն դարձնել ոչ միայն տեղադրման վայրին, այլև չափսերին ու ձևին։
Հայելային դեկորների ամենատարածված տարբերակներից մեկը մոզաիկան է, որը դիզայներական լավագույն լուծումներից մեկն է տան ցանկացած սենյակում։
Բացի հայելային մակերեսով դեկորներից, գոյություն ունեն նաև հայելային թաղանթով պանելներ, որոնք նույնպես ունեն արտացոլման հատկություն, ինչպես սովորական հայելիները։
Հայելային պանելները լինում են դեկորատիվ, պլաստիկ, ակրիլային, մետաղական և այլն, որոնցից ամենատարածվածներին՝ ակրիլային ու պոլիստիրոլ տեսակների մասին մանրամասն կխոսենք ստորև։
Ակրիլային հայելային պանելը համարվում է ամենատարածվածը։ Այն հարվածակայուն է, խոնավադիմացկուն, կայուն է ուլտրամանուշակագույն ճառագայթների ու բարձր ջերմաստիճանի նկատմամբ։ Սակայն այս նյութի վրա նկատելի կարող են լինել քերծվածքները։
Պոլիստիրոլից պատրաստված հայելային պանելները ճկուն են, ջերմադիմացկուն ու խոնավակայուն։ Իսկ մեխանիկական ազդեցության հետևանքով վրան ճաքեր չեն առաջանում։
ՊՎՔ պանելները սովորաբար օգտագործվում են առաստաղների դեպքում։ Ունեն բարձր խոնավակայունություն և անգամ ջրի հետ անմիջական շփման դեպքում չեն վնասվում։ Բացի այդ, անվտանգ են, այդ իսկ պատճառով կարելի է օգտագործել բնակելի տարածքներում։ Կան նաև ինքնակպչուն տարբերակներ, որոնք հեշտացնում են ամրացման գործընթացը։
Եթե ուզում եք ստեղծել ոճային ինտերիեր ու միաժամանակ տարածքը տեսողական առումով ընդարձակել, ապա հայելային դեկորները կարող են հիանալի լուծում լինել։