Լավ ինտերիեր դիզայները կարող է տարածքը դարձնել միաժամանակ գեղեցիկ ու ֆունկցիոնալ: Սակայն բոլորը չէ, որ կարող են ինտերիերի ձևավորման համար դիզայներ վարձել:
Դիտարկենք մի քանի օգտակար խորհուրդ, որոնց օգնությամբ կարելի է տարածությունն այնպես նախագծել, ասես դա մասնագետի ձեռքի գործ է: Հետևեք մեր կողմից առանձնացրած մի քանի խորհրդի և ինքնուրույն նախագծեք Ձեր ինտերիերը:
Օգտվեք դիզայներական ամսագրերից ու կայքերից
Սկսեք գաղափարների հավաքածու կազմելուց: Ինտերիերին նվիրված ռեսուրսներում տարբեր ոճերի ինտերիեր ստանալու բազմաթիվ տարբերակներ կան: Խորհուրդ ենք տալիս մի թղթապանակի մեջ առանձնացնել հավանած նախագծերը, որոնք հետո կարող եք մանրամասն ուսումնասիրել և դրանցից մեկն ընտրել որպես հիմք: Որոշ դետալներ կարելի է տեղափոխել մի ինտերիերից մյուսը:
Կիրառեք ճիշտ գունային սխեմաներ
Եթե արդեն ընտրել եք ոճը, ապա ժամանակն է անդրադառնալու նաև գունային սխեմային: Ինտերիեր դիզայնում դա շատ կարևոր կետ է, քանի որ գույներն ինտերիերում ստեղծում են որոշակի տրամադրություն:
Առհասարակ, խորհուրդ է տրվում չկենտրոնանալ միայն մեկ գույնի վրա, այլ ընտրել 3 գույն կամ 3 երանգի խառնուրդ: Դրանցից մեկը պետք է լինի պատերի հիմնական գույնը, մյուսը հարմար կլինի ուշադրությունը փափուկ կահույքին կենտրոնացնելու համար, իսկ երրորդը կգերիշխի փոքրիկ աքսեսուարների՝ բարձերի, ջահերի, սպասքի մեջ:
Ներառեք տեքստուրա ինտերիերի մեջ
Տեքստուրան պակաս կարևոր չէ, հատկապես եթե ընտրել եք միևնույն գույնի երանգներով սխեմա: Այսպիսով տարածությունը կմնա մեկ ամբողջական գունային գամմայի մեջ, միևնույն ժամանակ նկատելի կլինի բազմազանությունը՝ գործվածքի տարբեր մակերևույթների օգնությամբ:
Կատարեք կահույքի ճիշտ ընտրություն
Մի՛ ծանրաբեռնեք սենյակը կահույքի անհարկի առատությամբ: Փոխարենը փորձեք համադրել կահույքի մի քանի տարբերակներ:
Օրինակ դիզայներների մեծամասնությունը խորհուրդ է տալիս նույնիսկ փոքր սենյակում մեկ մեծ պահարան դնել: Մեծ ու փոքր ձևերի խառնուրդը կարևոր նշանակություն ունի հաջող դիզայնի համար:
Այս կանոնը գործում է նաև աքսեսուարների դեպքում:
Հետևեք վերը նշված խորհուրդներին և փորձեք ինքուրույն ստեղծել ձեր երազնաքների ինտերիերը:🙂