Երբ մոտենում է Ամանորը, բոլորս փորձում ենք մտածել բնակարանը զարդարելու և տոնական մթնոլորտ ու տրամադրություն ստեղծելու մասին:
Շատերը փորձում են զարդարել ավանդական դարձած դեկորատիվ աքսեսուարներով, իսկ շատերն էլ սեփական ձեռքերով են պատրաստում ամանորյա կոմպոզիցիաներն ու զարդարանքը:

Իսկ որտեղից սկսել զարդարանքը: Սկսենք մուտքի դռնից:

Տան գլխավոր մուտքի դուռը հարկավոր է զարդարել, որ հյուրը տան շեմին կանգնելուն պես զգա ամանորյա տրամադրությունը: Դա տպավորություն թողնելու և դրական լիցքեր տալու ձեր առաջին հնարավորությունն է: Հայտնի տարբերակ է եղևնու ճյուղերով, զանգակներով ու տարբեր ժապավեններով դուռը զարդարելու տարբերակները:

Պատուհանները կարելի է զարդարել տարբեր թղթե զարդարանքներով՝ պատրաստելով ձյան փաթիլներ, ճյուղեր, ձնեմարդ, ձյնունանուշիկ և այլն: Թղթե ֆիգուրները կարելի է ձևավորել բամբակի կամ գունավոր ներկերի օգնությմաբ:
Քիվերը կարող եք զարդարել գեղեցիկ պսակներով, իսկ վարագույրները՝ մեծ գնդերով: Պատուհանագոգերին կարելի է դնել ճյուղերով ու կոներով պատրաստված դեկորներ:

Դռներից և պատուհաններից հետո անցնենք բնակարանի միջանցքին, որն անկասկած պիտի տրամադրի հյուրասենյակում սպասող հրաշքին: Ինչ կարելի է անել: Ուղղակի պատերին ավելացրեք շատ հայելիներ, իսկ առաստաղն ու կահույքը զարդարեք լույսերով, բացի այդ առաստաղից կարող եք թղթե փաթիլներ կախել թելով: Հայելիներն, իհարկե, կկրկնապատկեն լույսերի ու փաթիլների քանակությունն ու շատ տոնական միջավայր կստեղծեն:

Իսկ հյուրասենյակում, իհարկե, պետք է տեղադրել ամենա-ամենա տոնածառը: Առանձնացնում են տոնածառը զարդարելու մի քանի ոճ:

Եվրոպական ոճ– Տոնածառը զարդարվում է փոքրիկ և մեծ նույն գույնի կամ երանգը ունեցող խաղալիքներով։ Ցանկալի է, որ տոնածառի վերևի հատվածում տեղադրվեն փոքրիկ, իսկ ներքևում՝ համեմատաբար ավելի մեծ խաղալիքները։

Ռետրո ոճ-Եթե ցանկանում եք տոնածառը զարդարել ռետրո ոճով, ուրեմն հարկավոր է գտնել հին խաղալիքներ՝ համադրելով դրանք տարբեր այլ դեկորների հետ։ Նման ձևավորումը բոլորին կտանի մանկություն:

Արևելյան ոճ-Տոնական եղևնին կարելի է զարդարել ավանդական կանաչ և կարմիր գույների համադրությամբ։ Դա հենց համարվում է արևելյան ոճը:

Ռոմանտիկ ոճ-Տանը մտերմիկ միջավայր ստեղծելու համար կարելի է տոնածառը զարդարել սպիտակ և արծաթագույն փայլերով, խաղալիքներով, ծաղիկներով, արհեսատական ձյան փաթիլներով։ Արդյունքում հյուրասենյակում կունենանք փոքրիկ ձմեռային հատված:

Իսկ դուք արդեն զարդարե՞լ եք Ձեր բնակարանը: